Tialtu: Robert Sanga, 10.03.2021
Mipi nih an thimhmi Pyithu-Hluttdaw le Amyotha-Hluttdaw hna
ihsin, Min Aung Hliang nih dan le dun zeirel loin, rampi nawlneihnak cu,
01-02-2021 ni ah a rak chuhpiak (VG-Militærkupp i Myanmar, 2021). November 2020 Election result
ningin, ram uknak kalpi a si ah cun, Min Aung Hliang nih nawl a neihmi tlawmte
cang lai. Ziah tih cun, ralkap a bomhtu USDP nih vote an ngahmi a tlawm tuk ruangah si. Mah cu, Kawlralkap nih an duh lo caah 2008 kum phunghrampi (Section 417)
hmangin, mipi duhnak zeirel loin, nawlneihnak an chuhpiak (Nikkei Asia, 2021).
Mipi nih 2010
ihsin 2020 tiang NLD sinah vote tamtuk an thlak. Nikum leh bangah cun, party
phunphun mipi aiawhtu an thimhmi (Hluttdaw vialte) 1113 lakah NLD nih 920 an
rak ngah (Union Election Comission, 2020). Mipi nih zeithimnak hrim tel lovin,
Kawlralkap nih 25% Hluttdaw thlahkhonak nawl, an neih pinah anmah bawmhtu USDP an
nei hrih. Si hmanh sehlaw, mipi nih NLD Hluttdaw caah vote tamtuk an rak thlak
caah ralkap nih nawltam an nei kho ti lo dingmi cu, Min Aung Hliang nih zeitin
hmanh a cohlan kho lo. Anmah tei liklaktu Pi Suu Kyi, mipi le NLD hna cu, Min
Aung Hliang nih a hua tuk bangin, mipi nih amah an hua tuk ve.
Min Aung
Hliang nih hin, meithal zei a nei lomi, Rohingya hna tam tuk a rak that bal (World
is One News - WION, 2021). Bangladesh ramah khin, Rohingya ralzam ting-nga reng
lo an um cang. Min Aung Hliang nih Rohingya hna sinah tuahsual a tuahmi vialte
hupheng dingah Pi Suu Kyi nih mualpho ngaiin International Court of Justice
(ICJ) ah bia a rak chimhpiak bal (United Nations, 2019). Zei ruangah tiah cun,
Pi Suu Kyi nih khin, mah rammi le rammi, a hle cein ralkap he remhnak tuah a
duh caah si. Si hmanh sehlaw, Min Aung Hliang hi kum 64 kimcangmi a si ii, tuahsual a tuahmi hrim tam tuk cang caah ralkap ihsin pensjon a lak tik can, a phan ah cun, a hau hmanh nih an hupheng kho lai lo.
Corona Virus Disease -2019 (COVID19) zawtnak, USA Election – Donald Trump versus Joe Biden, Syria ram buainak, India le China buainak, Rusia le NATO buainak, Amazon – Brazil & Australia ram meikang buainak, Iran, Irak, Israel, Palestine, Sudan - buainak tih ban tuk vawlei cung buainak phunphun um lio pinah Rohingya kong he peihtlaiin Pi Suu Kyi a mualpho lio, cantha neih lio tiah Min Aung Hliang nih hin, aa-na-a-thein-mi khi a si. Ne Win le Than Swe ban tukin, thih-hlan deng tiangin, pensjon lak lo ii, ramphaisa fir zong a timh pah le si. A rengah Min Aung Hliang hi hlanlio Kawlsiangpahrang hlun Thibaw Min (1859-1916) uar ngaimi a si caah British cozah nih India ramah va thi seh tiah an chhuahtermi, Thibaw Min phumnak a thlan-mual hmanh ah kalin, hehchet tiin thlarauchia/khuachia biaktu kha a si (Absolute History, 2020).
Insungkhar,
biakinn, khuatlang lakah zong si seh mi-upat duh ah cun, upat awkin um ding a
si. Rambawirian hna, tuan duh le bangah cun, mipi duhnak, mipi thimnak co-hlan
kho, i zuam ding khi si. Mipi duhnak le thimnak zeitel lo i, mah duhning poh i,
mipi-hrem/that lentu, Min Aung Hliang cu, Laiholh biafah “mi-hrut-tha-lo” kan
tihmi hman nih khin, a chei lo. Sehtan hmanh nih khin, “Nang, Min Aung Hliang, na sual-ral tuk caah na-thih-hlan tiang lawng si lovin, na thihnu hmanh ah na
tefa le tiangin, na-sual-ral-man an ei lai” tiah bia a khiah hrimte ko la !
APA
Style List of Referances:
Absolute History, 2020)
https://www.youtube.com/watch?v=PQgk6H2e62k&t=2825s
Nikkei Asia, 2021
Union Election Commission, 2020
United Nations, 2019
https://www.youtube.com/watch?v=oR6nCnlcmIE
VG (Myanmar militærkupp, 2021)
https://www.vg.no/nyheter/utenriks/i/OQEdnO/militaerkupp-i-myanmar-jernring-rundt-parlamentet
WION, 2021
https://www.youtube.com/watch?v=bnwcb6qQ1xM&list=LL&index=14&t=84s
A tha tuk, kan i lawm ee.
ReplyDelete