Welcome to Sui Than Sanga Blog!: Bawipa nih teinak a kan pek hrimhrim la

Robert Sanga (Suithansanga)

Dato: 20.12.2021

Kan chuahnak khua, mipi, pitar, putar, nungak, tlangval, mino le hngakchia tiang buainak phunphun le harnak phunphun pinah a kan thahtu khuachiathalo Min Aung Hliang le a ral-lo-kap hna hi Bawipa nih teinak an kan pek hrimhrim ko la. Laiminung 10,000 renglo khuasaknak Thlantlang khuapi an khanghnak he peihtlaiin Dr. Lian Hmun Sahkhong nih October 29, 2021 ni ah a chimhmi kha a hmanmi a si. Mah ban tukin Laimiphun nih harnak kan rak tuarbal loh, zeitik hmanah kan philhbal lai loh, Bawipa thawngin teinak kan ngah hrimhrim la (Dr. Lian Hmung Sahkhong, 2021).

Second World War liova, Nazi Hitler nih London khuapi hechetin mei a khangh ve. Sihmanhseh law, Nazi nih teinak an ngahbal loh. British Prime Minister Winston Churchill nih zeitlukin Hitler nih a kan tuk zongah kan zambal lailoh, a dawngnak tiang kan thuat ve la tiah bia a rak chimbal (Winston Churchill, 1940). A dawngnak cun, USA le ramdang nih an bawmh hna ii, Hitler cu an teibak ko. Hitler cu, amah le amah ai that.

Norway cozahpi nih a ram leilung rumhnak phunphun a ram le mipi caah a hmangh tikah cozah riantuantu hna, palik siseh, ralkap siseh, UDI siseh kan upat tuk hna. Petroleum zuarnak ihsin a ngahmi, Norwegian Kroner NOK 11 000,- Billion (1 billion = 1000 million, 11 000 billion = 11 000 000 million) deng cu, na caah le a ralaiding mino caah tiah Norges Bank nih an kan chiahpiak (Norges Bank, 2021). Khuachiafa Min Aung Hliang nih cu, kan chhuahnak ramleilung rumhnak hmangin an kan thatbak ko (Earth Rights International, 2011). Sizungah doctor thiam an kan chiahpiak duhloh, bialo bialakin siang hngakchia hna a chiah, tuahsual phunphun an tuah caah palik le ral-lo-kap hna an thih tikah kanni lawmh. Ziah tih cun, sehtan hmanh nih khin, Min Aung Hliang cu, a remh la loh caah a si.

Adolf Hitler (Documentary Movie, 2018), Osama Bin Ladin (NRK, 2021), Muamar Gaddafi (NRK, 2021) ban tukin Min Aung Hliang zong a can dihzawkzawk ko la. Laimi/Chinmi hna hi British le American missionary hna hmangin 1899 kum ihsin Bawipa nih an kanthimhmi miphun kan si (CHRO, 2021). Hmuidawtmi kan um bantukin, dawtlomi zong kan um, a dammi kan um bantukin, a zawmi zong kan um, kan takdum/rang, hmui dawh fim/hrutt kha, Bawipa nih an kan buaipi loh. Kan lungthin kha, a kan zohmi a si. Kan nih hnakin, harnak phunphun, mualphonak phunphun lawng si lovin, thihnak tiang a kan teipiaktu Bawi Jesuh Krih sinah a biataktein bawmh kan hal a hau (The Church of Jesus Christ of Latter-day Saints, Bible Videos).

Meithal tlaih hi a fawite loh. A herhmi pakhat a si ve. Kan chhuahnak ram le miphun caah meithal a kan tlaihpiak lawng si lovin, nunnak tiang an kan pekpiaktu, CNA, CDF, KIA, KNA, PDF, SSA le an kan zuampiaktu vialte, Bawipa nih thlachuah a pek hrim ko la. Vawlei cungah thiltha lo, buaibainak, pandemi zawtnak (COVID19) le thihnak phunphun phan hmanh seh law, Bawipa kan zumh ii, thiltha pakhatetal tuah kan timh ah cun, teinak le thlachuah kan ngah hrimhrim la. "May the grace of the Lord Jesus Christ, and the love of God, and the fellowship of the Holy Spirit be with you all" (2 Corinthians 13:14).

Referanserlist:

Adolf Hitler (Documentary Movie, 2018)

https://www.youtube.com/watch?v=cTqpak2lLkI

Chin Human Rights Organisation (CHRO, 2021)

https://www.chinhumanrights.org/christianity-in-eastern-chinland/

The Church of Jesus Christ of Latter-day Saints, Bible Videos

https://www.youtube.com/playlist?list=PL4A73DDEE675FBC39

2 Corinthians 13:14

https://www.biblegateway.com/passage/?search=2%20Corinthians%2013%3A14&version=NIV

Dr. Lian Hmung Sakhong (29.10.2021)

https://www.youtube.com/watch?v=er3nEQGwyQM

Earth Rights International (2011)