By Sui Than Sanga
Rin loh takin Norway ram Prime Minister Jens Stoltenberg office leh sorkar building pawl bulah 22 July, 2011 ni khan bomb tih puah a ni. Bomb puahna hmun hi Oslo khuapui lairil tak a nih bakah hmun pawimawh tak pawh a ni. A puaknat hle vangin sorkar building a chhiat nasat bakah inhliam pem an tamin, nunna chan ta pawh mipariat lai an tling tawh tia hriat a ni.
Chutia bomb puahna hun rei lova, Arbeidenes Ungomsfylking (AUF) pawl inkhawmpuina hmun Utøya khuamual ah mipui tlingkhawm 650 zingah thalai 68 tein trumkhatah kah hlum an tuar bawk a ni. Inkahna hmun Utøya atrang tuifinriat lam panin tlanchhuah tuma boral ta tia rin, ruang thenkhate chu zawng hmuh theih hrih loh a ni. Bomb puak vangin nasa takin hliam tuarte dinhmun pawh hriatchiang hrih loh a nih vangin boralte hi tun aiin an tam zawk mai thei tiin norsk rikskringkasting (NRK) chuan a puang a ni.
Tuntrum ah chhiatna ang hi Norwegian pawlin khawvel indopui pahnihna (second world war) zawh atrang khan an tawng ngai hrih lo a ni. Lei khawvel ram hrang hrangte zingah ralmuan ber ramin tiang khawpin chhiatna a tuar ta hi a pawi hle a ni.
Politi sikkerhetstjeneste (PST) pawlin Oslo khuapui ah bomb tipuaktu leh Utøya ah silai hmangin thalaite suasamtu Anders Behring Breiviks (Anders) chu an man fel tawh a ni. Anders hian mahni pualin Norway leh Europe ram pawl rorel dan leh mipui nun phung thlak danglam tumin, a lo inbuatsaihna hi kum 9 lai a tling tawh nia hriat a ni. Norwegian ni mahse tiang khawpin a ram-mite chungah kut a thlak duh mai hi hriatthiam a har hle a ni.
Anders hian Muslim firfiak pawl a duh loh bakah Scandinavian leh Europe khuamual ah ram dangmi pungbelh zel hi rem a ti lo bur mai a ni. Tiang pawl leh tunna thuneihna chelh mek Arbeider parti (Labour party) dodalna a neih langtir hma hian “2085 A European Declaration of Independence” tih page 1500 lai tling “Manifesto” lehkha pawh a buatsaih bawk a ni.
Chawlhni 24-07-2011 khan khua har chhungte tan national levelin lusun inkhawm tawngtaina chu a ram chhung biakin hrang hrang ah buatsaih a ni. Thawhtan 25/07/2011 ni tlai lam dar 12:00 chiah khan a rampum huapin minute khat chhung ngawih rengna neih bakah mipuitein an trangrual zia lang tir nan khuatin deuh thaw ah kawng an zawh bawk a ni. Norway ramin rin loh takin chhiatna a tawng vangin a ram-mite lung chhiatna hi khawvel ram hrang hrangah ram hruai tutein an tuarhpui nasa hle bawk a ni.
Muslim sakhuana firfiak taka hmangin America rama buaina siamtu Osama Bin Ladin boralna rei lova, Anders Behring Breiviks hian Norway rama buaina danglam tak a siam chhuak leh a ni. An buaina siam vangin rapthlak takin boral ta leh nasa takin inhliam pem pawh an tam hle a ni. A bik takin tuntruma tuar fal bik Norwegian pawl tan kan tawngtaipui theuh dawn nia.
