”Thlarau Thiang Hlim” (The Holy Ghost)

By Sui Than Sanga


Pathian thlarau thiang hlim hi tisa leh ruh a neih loh ruangah kan mah minung sinah a um ring ring thei. Doctrine and Covenants 130:22 ih mirang cain nganmi siar len: “The Father has a body of flesh and bones as tangible as man’s; the Son also; but the Holy Ghost has not a body of flesh and bones, but is a personage of Spirit. Were it not so, the Holy Ghost could not dwell in us” tih a si. Thlarau thiang hlim nih ruh leh tisa a neih loh ruangah leilung tlun ih minung pawl a umpi theih dan thuhla cu fiangtein theih thei a si.

Bible leh Christian sakhuanak dang dang nih an hmangmi ca uk pawl ngantu hi thlarau thiang hlim a si. Minung finnak leh thiamnak nih ziang tin hman a suh ban lo mi, thufing leh thuhlun pawl hmuah hmuah cu, thlarau thiang hlim nih kan theih theinak dingah a tarlang theh si. Leitlun minung pawl chi-thlahtu Adam leh Eve thuhla khal kha Genesis ah thlarau thiang hlim nih minung hmangin rak phuang hlah seh law kan thei zik lo. Pathian thlarau thiang hlim nih minung a rak bawm dan cu, Lal Solomon, Job, James, Peter leh zawl nei hrang hrang pawl thuhla kan siar tikah theih thei a si.

Archeology pawl nih kum thawnghra hnakin thil hlun pawl leh Egypt ram ih Pyramid phun phun cu, an phawrh chhuak thei ko. Leilung tlung minung hmasa bik cu, Africa ramah an rak um dah zo tih khal an thei. A si nan, an thil hmuh suahmi thuhla pawl kimchang zetin ziangtin hman an tarlang thei lo. Minung fimthiam nak nih ruah leh theih thei ban lo-mi thuhlun pawl cu, thlarau thiang hlim bawmnak lawngin theih thei a si.

Pa leh fapa leh Thlarau Thiang Hlim hming salin Baptism kan tuah hnuah hin Pathian thlarau thiang hlim cu, kan sinah a um thei. Pathian nih induhdawt tuk ruangah A Fapa mal neih sun cu, leitlun ah a rak piang ter. Kan sual sim thei lo-mi pawl lak ih sin chandamtu rak piangni Christmas hi thlacamnak thawn lawm dan thiam khal a thupi zet. Pathian thu hi rilru leh tih tak zetin, thlacamnak thawn kan siar a si len, thlarau thiang hlim tanpinak tampi kan dawng thei.

Hlawknak leh ham that duh minung pawl hi thlarau chia nih nitin chengchilh theimi kan si. Kan mit, beng, hnar leh tisa ih duhdan vekin kan khuasa reng reng a si len tluk chhiatnak kan tawng ding. Kan lei taksa hrangah tha lo mei zial, sah dah, zu leh ruih theih thil phun phun lak ih sin, kan thiar fihlim thei atul zet. TV, Radio, Film, Internet, Phone leh Modern khawlthil pawl ih sin fimthiamnak kan ngah thei vekin hmang dan kan thiam lova cun, suah sualnak khal tampi a um. Music bawraw ngaiin leh film tha lo pawl zoh kan hmang theu a sile, thlarau chia nih insiat suah thei a si.

Pathian thlarau thiang hlim bawmnak kan ngah theinak dingah kan zuam ve khal a tul. Pathian thu thiang hlim siarin nitin thla kan cam ring ring, a pawi mawh zet. Thil kan zirnak ah si seh, rian kan tuannak ah si seh, kan ram leh hnam hrangah si seh, kan zuam nasat atul si. Pathian kan zum ngai ngai tikah kan thil tuahnak poh pohva, hlawh tlingnak kan nei thei ding.